台籍日本兵/Tâi-che̍k Ji̍t-pún peng

昨暗我聽了有關台籍日本兵ê 演說，怹ê 故事真正悲哀。我一邊ê 阿公是高座少年工，另一邊ê 伯公是軍伕，去南洋就無轉來。

蔡英文怹爸爸彼當時佇滿洲國修理飛行機，同阮阿公是仝行。

紀錄片《綠的海平線》就是咧講這。伊ê 英文名"Shonenko"就是「少年工」ê 意思。

彼當時攏總有20萬台籍日本兵。八萬是兵，其餘ê 是軍伕（像阮伯公）、看護婦、看護婦ê 助手、少年工（像阮阿公）。台灣人口有600萬，換句話講，每30人就有一ê 台籍日本兵。

八萬兵其中，三萬無轉來。轉來ê 兵戰後紲予國民黨徵去中國拍內戰。有一寡予共產黨掠去，倒轉來拍國民黨，也有予送起韓戰做炮仔烌。一萬五千就按呢無轉來。總來講，攏毋是為著家己ê 故鄉咧拚命，實在是悲哀。

Cha-hng góa thiaⁿ liáu iú-koan Tâi-che̍k Ji̍t-pún peng ê ián-soat, in ê kò͘-sū chin-chiàⁿ pi-ai. Góa chi̍t-piⁿ ê a-kong sī Ko-chō siáu-nî kang, lēng chi̍t-piⁿ ê peh-kong sī kun-hu, khì Lâm-iông tō bô tńg lâi.

Chhòa Eng-bûn ê pa-pa hit tong-sî tī Boán-chiu-kok siu-lí hoe-lêng-ki, kâng goán a-kong sī kâng-hâng.

Kí-lo̍k-phìⁿ "Le̍k ê hái-phîⁿ-sòaⁿ" tō sī leh kóng che. I ê Eng-bûn miâ "Shonenko" tō sī "siáu-nî kang" ê ì-sù.

Hit tong-sî lóng-chóng ū 20 bān Tâi-che̍k Ji̍t-pún peng。Peh bān sī peng，kî-û ê sī kun-hu（chhiūⁿ goán peh-kong）、khan-hō͘ hū、khan-hō͘ hū ê chō͘-chhiú、siáu-nî kang （chhiūⁿ goán a-kong）。Tâi-oân jîn-kháu ū 600 bān，ōaⁿ-kù-ōe-kóng，múi 30 lâng tō ū chi̍t ê Tâi-che̍k Ji̍t-pún peng。

Peh bān peng kî-tiong，saⁿ bān bô tńg-lâi。Tńg-lâi ê peng chiàn-āu sòa hō͘ Kok-bîn-tóng cheng khì Tiong-kok phah lōe-chiàn。Ū chi̍t-kóa hō͘ Kiōng-sán-tóng lia̍h khí，tó tńg-lâi phah Kok-bîn-tóng，iā ū hō͘ sàng khì Hân-chiàn chò phàu-á-hu。Chi̍t bān gō͘ chheng tō án-ne bô tńg-lâi。Chóng lâi kóng，lóng m̄-sī ūi-tio̍h ka-kī ê kò͘-hiong leh piàⁿ-miā，si̍t-chāi sī pi-ai。