因為我咧煩惱佇Ì-tāi-lī食傷濟會閣變大箍，Gianluca就𤆬我去𬦰山。阮ê目標是海拔六百外公尺ê Superga di Basilica，坐車對Torino到Rivoli ê 路--裡就看會著。阮頂禮拜一下晝就對Gianluca爸母怹兜出發，先行路去坐公車，閣換地鐵到Porta Nouva--就是新ê門ê意思。彼區有以早Savoia王室ê宮殿，一寡政府機關，歐洲上大ê埃及博物館，劇院，Torino ê 地標Mole，當然，閣有誠濟餐廳佮商店，真鬧熱。
阮凊采佇Vittorio Veneto埕附近食一盤Ì-tāi-lī麵做中晝，就開始行去朝聖--矣。先行到Po河邊仔--這條是歐洲城市一定愛有ê單音節河流。阮順溪仔墘行差不多三公里，綴Porte Sassi 過橋，開始𬦰山。拄開始是一般道路，後--來就切到豋山ê步道。步道ê路標是標時間，毋是標距離，我看著ê時陣感覺真趣味，嘛想講按呢敢有影？毋過我發現講這馬阮大部分行ê時間攏比路標ê時間閣較短，應該是健身有效--lah！到教堂ê時陣，我ê Garmin錶仔講阮𬦰了500公尺。
原來佇這个山頂，干焦有一間足舊ê聖母院。佇十八世紀初，Torino予法國佮西班牙圍攻，彼陣ê公爵Vittorio Amedeo II 佇聖母院咒誓講，若是會使拍贏聯軍，伊就欲起一間教堂。咒誓了就拍贏矣，就按呢，伊佇1717年請彼陣上有名ê建築師Filippo Juvarra來起這間教堂。Fillipo Juvarra嘛佇Torino設計幾若間有名ê所在，因為彼陣Torino發展誠濟誠緊。毋過佇1731年教堂落成ê時陣，Vittorio Amedeo II因為政變失敗予人關佇Rivoli ê 城堡，袂當來參加典禮。
Savoia家族ê墓室（crypt）佇這間教堂地下，阮就買票去參觀。導覽--ê 是講Ì-tāi-lī話，所以伊予我一本小冊，是英文ê翻譯。我學著真濟Savoia家族ê歷史。Savoia家族是Ì-tāi-lī王國ê王室，Torino是Ì-tāi-lī王國頭一个首都(1861-1865)；彼陣Ì-tāi-lī猶未統一，中南部是教皇國佮Napoli王國，猶有法國統治ê領域。十八世紀初期，Savoia家族猶是伯爵；怹拍贏法國kiâⁿ西班牙聯軍無偌久，Vittorio Amedeo 二世予人加冕做Sicily ê 國王；閣來無偌久，伊提Sicily換Sardinia，就變作Sardinia ê 國王。我聽到遮，就想講：按呢敢會使？你是咧耍大富翁諾？
毋管按怎，伊作國王了後，就袂使干焦是伯爵，就按呢，予伊升作公爵。
我知影講Savoia這个貴族家族，是聽著Gianluca講Torino ê 歷史。這改參觀這个地下墓室，才發現講，這个家族使弄政治真正足𠢕–ê。歐洲各大王室，對西班牙到Ò-tē-lī，怹攏有做親情。雖然講歐洲王室相做親情嘛毋是心適ê代誌，毋閣進前我單想講Savoia干焦是細跤貴族耳，無定著怹ê親情攏遐爾有名，真正是烏矸仔貯豆油。
其中一代Carlo Alberto，怹某是Maria Teresa of Austria，是Habsburg皇室成員，後--來佇Torino過身。毋閣我隔當工去查才知影講，伊毋是彼个上有名ê Ò-tē-lī女皇帝Maria Teresa--Maria Teresa這个皇帝足有名，咱這馬佇Vienna四界攏看會著伊ê宮殿--所以講，Maria Teresa是貴族ê菜市仔名。
後--來阮嘛𬦰樓梯到教堂ê穹頂，佇遐會當看著Torino規ê城市、Po河、阮開始行ê埕--裡。佇教堂內底我有留我ê台語名。彼陣有神父咧𤆬祈禱，Gianluca講怹一直咧唸仝一句，欲袂堪得--矣，阮才倒轉來。
落山ê時陣阮去坐火車--上尾一班。阮佇遐研究講這个火車是按怎振動，因為無看著電線，嘛無看著燒煤ê煙，而且燒煤嘛無蓋環保。上尾阮發現講鐵道有喙齒ê結構，原來是咬著這个齒來予火車來走。Gianluca ê朋友共我講，這个火車號作dentera。dentera 是Piemonte ê 方言，就是喙齒(dental) ê 意思。遮ê火車1934年就開始運作矣，可能差不多是台灣糖廠ê五分仔車開始走ê時陣。
落山了阮佇Torino 食熱量真懸ê zabaione，這就是卵仁佮牛奶濫作伙，我真愛食。暗頓佮Gianluca ê 朋友鬥陣，彼間餐廳ê 菜單有Ì-tāi-lī 佮Piemonte 兩種語言喔！
No comments :
Post a Comment